ഒരുമനയൂരിൽ കാറിടിച്ച് സ്കൂട്ടർ യാത്രികന് ദാരുണാന്ത്യം

*_19-06-2026 വെള്ളി_*

തൃശൂർ: ഒരുമനയൂരിൽ കാറിടിച്ച് സ്കൂട്ടർ യാത്രികൻ മരിച്ചു. ഒരുമനയൂർ തൈക്കടവ് മുഹമ്മദിന്റെ മകൻ മാളിയേക്കൽ നൗഷാദ് (55) ആണ് മരിച്ചത്. ഇന്ന് പുലർച്ചെ വില്യംസിനു സമീപം ദേശീയപാത 66-ന്റെ സർവ്വീസ് റോഡിലായിരുന്നു നാടിനെ നടുക്കിയ അപകടം ഉണ്ടായത്.

ബ്ലാങ്ങാട് ബീച്ചിൽ പ്രവർത്തിക്കുന്ന സിമന്റ് സ്ഥാപനത്തിലെ ഡ്രൈവറാണ് നൗഷാദ്. ഇന്ന് പുലർച്ചെ ജോലിസ്ഥലത്തേക്ക് സ്കൂട്ടറിൽ പോകുമ്പോഴായിരുന്നു അപകടം. നൗഷാദ് സഞ്ചരിച്ചിരുന്ന വാഹനത്തിന് പുറകിൽ തമിഴ്നാട് സ്വദേശികൾ സഞ്ചരിച്ചിരുന്ന കാർ നിയന്ത്രണം വിട്ട് വന്നിടിക്കുകയായിരുന്നു.

ഇടിയുടെ ആഘാതത്തിൽ ഗുരുതരമായി പരിക്കേറ്റ നൗഷാദിനെ ഉടൻ തന്നെ ചാവക്കാട് ഹയാത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിൽ എത്തുമ്പോഴേക്കും മരണം സംഭവിച്ചിരുന്നു.

മൃതദേഹം നിലവിൽ ഹയാത്ത് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. പോലീസിന്റെ ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റുമോർട്ടത്തിനായി മാറ്റുമെന്ന് അധികൃതർ അറിയിച്ചു.