മുൻ മേയർ ആര്യ രാജേന്ദ്രനും ആയുള്ള തർക്കത്തിൽ ജോലി നഷ്ടമായ യദുവിന് കേരള നിയമസഭയിൽ ഡ്രൈവറായി താത്കാലിക നിയമനം

തിരുവനന്തപുരം മുൻ മേയർ ആര്യ രാജേന്ദ്രനുമായുള്ള നടുറോഡിലെ തർക്കത്തെ തുടർന്ന് കെഎസ്ആർടിസിയിലെ താത്കാലിക ജോലി നഷ്ടപ്പെട്ട ഡ്രൈവർ എച്ച്.എൽ. യദുവിന് നിലവിൽ കേരള നിയമസഭയിൽ ഡ്രൈവറായി താത്കാലിക നിയമനം ലഭിച്ചു. ദിവസവേതനാടിസ്ഥാനത്തിലാണ് ഈ നിയമനം നൽകിയിരിക്കുന്നത്.

2024 ഏപ്രിൽ 27-ന് രാത്രി പാളയം സാഫല്യം കോംപ്ലക്‌സിന് മുന്നിൽ വെച്ചാണ് സംഭവമുണ്ടായത്. മേയറും ഭർത്താവ് സച്ചിൻ ദേവ് എംഎൽഎയും സഞ്ചരിച്ചിരുന്ന കാറിന് സൈഡ് കൊടുത്തില്ലെന്നും, കാറിനെ ഇടിക്കുന്ന രീതിയിൽ ബസ് ഓടിച്ചെന്നും, ഡ്രൈവർ അശ്ലീല ആംഗ്യം കാണിച്ചെന്നും ആരോപിച്ച് മേയർ കാറിട്ട് ബസ് തടയുകയായിരുന്നു.
മേയറുടെ പരാതിയിൽ കൺടോൺമെന്റ് പോലീസ് കേസെടുത്തതോടെയാണ് കെഎസ്ആർടിസി താൽക്കാലിക ഡ്രൈവറായിരുന്ന യദുവിനെ ഡ്യൂട്ടിയിൽ നിന്ന് ഒഴിവാക്കിയത്. ഇതിനിടയിൽ ഉപജീവനത്തിനായി യദു സ്വിഗ്ഗി ഡെലിവറി ബോയ് ആയും ജോലി ചെയ്തിരുന്നു