ഫുട്ബോളാണ് ലഹരി : ലഹരിക്കെതിരെ ഗോൾ അടിച്ച് ലോകകപ്പിനെ വരവേറ്റ് AIYF

തൃശ്ശൂർ : 2026 ഫിഫ ലോകകപ്പിനെ വരവേറ്റ് AIYF സംഘടിപ്പിച്ച 'KICKOFF' പരിപാടി തൃശ്ശൂരിൽ ആവേശമായി. 'ഫുട്ബോളാണ് ലഹരി' എന്ന മുദ്രാവാക്യമുയർത്തി ലഹരിക്കെതിരെയുള്ള ബോധവത്കരണമാണ് പരിപാടിയുടെ പ്രധാന ലക്ഷ്യം.
ലഹരിക്കെതിരെ സംഘടിപ്പിച്ച പെനാൽറ്റി ഷൂട്ടൗട്ട് മത്സരത്തിൽ നൂറുകണക്കിന് പേർ പങ്കെടുത്തു. ലഹരിക്കെതിരെ ഗോൾ അടിക്കുന്നവർക്ക് പ്രത്യേക സമ്മാനങ്ങൾ നൽകി.
AIYF ജില്ലാ സെക്രട്ടറി പ്രസാദ് പറേരി പരിപാടി ഉദ്ഘാടനം ചെയ്ത പരിപാടിയിൽ ജില്ലാ പ്രസിഡന്റ്‌ ബിനോയ്‌ ഷബീർ അധ്യക്ഷത വഹിച്ചു. കായിക താരങ്ങളും സാംസ്കാരിക പ്രവർത്തകരും തൃശ്ശൂർ റൗണ്ടിലെ സായാഹ്ന നടത്തക്കാരും ഒട്ടനവധി യുവതി യുവാക്കളും പരിപാടിയിൽ പങ്കെടുത്തു. ലോകകപ്പ് ആവേശം നാട്ടിൽ ആളിക്കത്തിക്കാനും അതേസമയം യുവതലമുറയെ ലഹരിയിൽ നിന്ന് അകറ്റി കായികരംഗത്തേക്ക് കൊണ്ടുവരാനുമാണ് ഇത്തരമൊരു പരിപാടി സംഘടിപ്പിച്ചതെന്ന് സംഘാടകർ പറഞ്ഞു. എ ഐ വൈ എഫ് സംസ്ഥാന കമ്മിറ്റി അംഗം വി കെ വിനീഷ് സ്വാഗതവും ജില്ലാ എക്സിക്യൂട്ടീവ് അംഗം ബിനീഷ് ചില്ലിക്കൻ നന്ദിയും രേഖപ്പെടുത്തി.

തൃശ്ശൂർ തേക്കിൻകാട് മൈതാനിയിൽ നടന്ന പരിപാടി കാണാൻ നൂറുകണക്കിന് ആളുകൾ തടിച്ചുകൂടി. ഫുട്ബോൾ ലഹരിയിൽ നാട് ഒന്നാകെ ആറാടുകയായിരുന്നു.