പുതുവർഷത്തിലെ പ്രധാന ആഘോഷങ്ങൾക്ക് മോഹൻലാൽ ചിത്രങ്ങളുടെ റിലീസ്

ആരാധകർക്ക് ആവേശം പകർന്ന് പുതുവർഷത്തില്‍ പ്രധാന ആഘോഷങ്ങള്‍ക്കെല്ലാം മോഹൻലാല്‍ ചിത്രങ്ങളുടെ റിലീസ്. വിഷുവിന് ദൃശ്യം 3, പാട്രിയറ്റ്, ഓണത്തിന് ഖലീഫ, തുടക്കം, ജയിലർ 2, പൂജ റിലീസായി എല്‍ 365 എന്നിവയാണ് ഇത്തവണ എത്തുന്ന മോഹൻലാല്‍ ചിത്രങ്ങള്‍.

ഈ ചിത്രങ്ങളെല്ലാം എത്തുന്നത് ഉത്സവ സീസണിലാണ് എന്നതാണ് ഏറ്റവും വലിയ പ്രത്യേകത. മോഹൻലാല്‍- ജീത്തു ജോസഫ് കൂട്ടുകെട്ടില്‍ എത്തുന്ന ദൃശ്യം 3 ഏപ്രില്‍ 2ന് ലോകവ്യാപകമായി റിലീസ് ചെയ്യുന്നത്.

മമ്മൂട്ടിയും മോഹൻലാലും ഒരുമിക്കുന്ന ബ്രഹ്മാണ്ഡ ചിത്രം പാട്രിയറ്റ് ഏപ്രില്‍ 23നാണ് ലോക വ്യാപകമായി റിലീസ് ചെയ്യും. മഹേഷ് നാരായണൻ രചനയും സംവിധാനവും നിർവഹിക്കുന്ന ചിത്രം ട്വന്റി 20ക്ക് ശേഷം ഏറ്റവും കൂടുതല്‍ താരങ്ങള്‍ അണിനിരക്കുന്ന ചിത്രം കൂടി ആണിത്. ഓണത്തിന് റിലീസായി എത്തുന്ന ഖലീഫ, തുടക്കം, ജയിലർ 2 എന്നീ ചിത്രങ്ങളില്‍ മോഹൻലാല്‍ അതിഥി വേഷത്തിലാണ്. പൃഥ്വിരാജ് നായകനായി എത്തുന്ന ഖലീഫ വൈശാഖാണ് സംവിധാനം. മോഹൻലാലിന്റെ മകള്‍ വിസ്മയ മോഹൻലാല്‍ നായികയായി അരങ്ങേറ്റം കുറിക്കുന്ന തുടക്കം ജൂഡ് ആന്തണി ജോസഫ് സംവിധാനം ചെയ്യുന്നു. ജയിലറിലെ കഥാപാത്രത്തിന്റെ തുടർച്ചയായി രജനികാന്ത് ചിത്രം ജയിലർ 2 വില്‍ മോഹൻലാല്‍ എത്തുന്നു.

തുടരും എന്ന ബ്ളോക് ബസ്റ്ററിനുശേഷം മോഹൻലാലും തരുണ്‍ മൂർത്തിയും ഒരുമിക്കുന്ന പേരിടാത്ത ചിത്രത്തിന്റെ പൂജ റിലീസായി ഒക്ടോബർ 17 ന് തിയേറ്ററുകളില്‍ എത്തും. ഏറെക്കാലത്തിനുശേഷം മോഹൻലാല്‍ പൊലീസ് വേഷത്തില്‍ എത്തുന്ന ചിത്രത്തില്‍ മീര ജാസ്മിൻ ആണ് നായിക. രചന രതീഷ് രവി, ഛായാഗ്രഹണം ഷാജികുമാർ നിർവഹിക്കുന്നു. സംഗീതം ജേക്സ് ബിജോയ്.