കരിപ്പൂർ പോലീസ് സ്റ്റേഷനിൽ നിന്നും പത്ത് ലക്ഷം രൂപക്ക് മുകളിലുള്ള സ്വർണം കാണാതായി

പൊതുജനങ്ങളും പോലീസ് ഉദ്യോഗസ്ഥരും പല സമയങ്ങളിലായി കണ്ടെത്തി സ്റ്റേഷനിൽ വിശ്വസിച്ച് ഏൽപ്പിച്ച 10 ലക്ഷത്തിലധികം രൂപ മൂല്യമുള്ള സ്വർണാഭരണങ്ങൾ കരിപ്പൂർ പോലീസ് സ്റ്റേഷനിൽ നിന്ന് കാണാതായി. സുരക്ഷിതമായി സൂക്ഷിക്കേണ്ടിയിരുന്ന തൊണ്ടിമുതലുകൾ സ്റ്റേഷനകത്ത് നിന്ന് തന്നെ അപ്രത്യക്ഷമായത് പോലീസ് സേനയ്ക്ക് വലിയ നാണക്കേടാണ് ഉണ്ടാക്കിയിട്ടുള്ളത്.

നാട്ടുകാർ 2018-ന് മുൻപ് സ്റ്റേഷനിൽ ഏൽപ്പിച്ച സ്വർണമാല, ബ്രേസ്ലെറ്റ് എന്നിവയും, 2024 ഒക്ടോബറിൽ കരിപ്പൂർ വിമാനത്താവളത്തിൽ നിന്നും മറ്റ് പൊതുസ്ഥലങ്ങളിൽ നിന്നും കളഞ്ഞുകിട്ടിയ രണ്ട് മാലകൾ, രണ്ട് കമ്മലുകൾ, ഒരു മോതിരം എന്നിവയടക്കമാണ് കാണാതായിട്ടുള്ളത്. ഈ വർഷം ഫെബ്രുവരിയിലാണ് സ്വർണം കാണാനില്ലെന്ന വിവരം രഹസ്യാന്വേഷണ വിഭാഗം കണ്ടെത്തുകയും ഉന്നത അധികാരികൾക്ക് റിപ്പോർട്ട് നൽകുകയും ചെയ്തത്. എന്നാൽ, നിലവിൽ സ്റ്റേഷന്റെ ചുമതലയുള്ള ഉദ്യോഗസ്ഥർക്ക് സ്വർണം എങ്ങോട്ട് പോയി എന്നതിൽ കൃത്യമായ മറുപടി നൽകാൻ കഴിയുന്നില്ല.