പ്രമുഖ മെസ്സേജിങ് ആപ്പായ ടെലിഗ്രാമിന് ഇന്ത്യയിൽ താൽക്കാലിക വിലക്ക്

ജൂൺ 21 ന് നടക്കാനിരിക്കുന്ന നീറ്റ്-യുജി 2026 പുനഃപരീക്ഷയുടെ സുരക്ഷ മുൻനിർത്തി രാജ്യത്ത് പ്രമുഖ മെസേജിങ് ആപ്പായ ടെലിഗ്രാമിന് താൽക്കാലിക നിയന്ത്രണം

. പരീക്ഷയുമായി ബന്ധപ്പെട്ട തട്ടിപ്പുകളും വ്യാജ വിവരങ്ങളും തടയുന്നതിന്റെ ഭാഗമായി നാഷണൽ ടെസ്റ്റിങ് ഏജൻസി (എൻ‌ടി‌എ) യുടെ ശുപാർശപ്രകാരമാണ് കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിന്റെ (MeitY) ഈ നടപടി.ആപ്പിന് നിയന്ത്രണം ജൂൺ 22 വരെയാണ്. കൂടാതെ, വ്യാജ പ്രചാരണങ്ങൾ തടയുന്നതിനായി ടെലിഗ്രാമിലെ സന്ദേശങ്ങൾ എഡിറ്റ് ചെയ്യാനുള്ള ഫീച്ചർ ജൂൺ 30 വരെ കേന്ദ്രസർക്കാർ നിർദേശപ്രകാരം പ്രവർത്തനരഹിതമാക്കിയിട്ടുമുണ്ട്.

ചോദ്യപേപ്പർ ചോർന്നുവെന്ന വ്യാജ തെളിവുകൾ ഉണ്ടാക്കാൻ ടെലിഗ്രാമിന്റെ എഡിറ്റിങ് ഫീച്ചർ ദുരുപയോഗം ചെയ്യുന്നതായി എൻ‌ടി‌എ കണ്ടെത്തിയിരുന്നു. പഴയ പോസ്റ്റുകൾ എഡിറ്റ് ചെയ്ത്, പരീക്ഷയ്ക്ക് ശേഷം ചോദ്യപേപ്പറുകൾ അറ്റാച്ച് ചെയ്താൽ പോലും യഥാർത്ഥ ടൈംസ്റ്റാമ്പ് നിലനിൽക്കും. ഇത് പേപ്പർ മുൻകൂട്ടി ചോർന്നതാണെന്ന് വരുത്തിതീർക്കാൻ തട്ടിപ്പുകാർ ഉപയോഗിക്കുന്നു. എഡിറ്റിങ് ഫീച്ചർ താൽക്കാലികമായി നിർത്തുന്നത് പുതിയ സന്ദേശങ്ങൾ അയക്കുന്നതിനെയോ സ്വീകരിക്കുന്നതിനെയോ ബാധിക്കില്ലെന്നും എൻടിഎ വ്യക്തമാക്കിയിട്ടുണ്ട്