അറേബ്യൻ കടലിൽ യുഎസ് നാവികസേനയുടെ വിമാനവാഹിനിക്കപ്പലിന് അടുത്തേക്ക് എത്തിയ ഒരു ഇറാനിയൻ ഡ്രോൺ യുഎസ് സൈന്യം വെടിവച്ചിട്ടതായി റിപ്പോർട്ട്

വാഷിംഗ്ടൺ: അറേബ്യൻ കടലിൽ നിലയുറപ്പിച്ചിരിക്കുന്ന അമേരിക്കൻ വിമാനവാഹിനി കപ്പലായ യുഎസ്എസ് അബ്രഹാം ലിങ്കണിന് സമീപം പ്രകോപനപരമായി പറന്ന ഇറാനിയൻ ഡ്രോൺ യുഎസ് സേന വെടിവെച്ചിട്ടു. ഫെബ്രുവരി 3-ന് നടന്ന സംഭവത്തിന്റെ വിശദാംശങ്ങൾ യുഎസ് സെൻട്രൽ കമാൻഡ് പുറത്തുവിട്ടിട്ടുണ്ട്.
ഇറാൻ നിർമ്മിത ഷാഹിദ്-139 വിഭാഗത്തിൽപ്പെട്ട ഡ്രോണാണ് തകർത്തത്. വിമാനവാഹിനിക്കപ്പലിനെ ലക്ഷ്യമാക്കി ആക്രമണാത്മക രീതിയിൽ വന്ന ഡ്രോണിനെ പിന്തിരിപ്പിക്കാൻ പല
തവണ ശ്രമിച്ചെങ്കിലും പരാജയപ്പെട്ടതോടെയാണ് വെടിവെച്ചിട്ടതെന്ന് സേനാ വക്താക്കൾ അറിയിച്ചു.

വിമാനവാഹിനിയിൽ നിന്ന് പറന്നുയർന്ന എഫ്-35സി ഫൈറ്റർ ജെറ്റാണ് ഡ്രോൺ തകർത്തത്. ഇറാന്റെ തെക്കൻ തീരത്തുനിന്ന് ഏകദേശം 800 കിലോമീറ്റർ അകലെ അന്താരാഷ്ട്ര ജലപ്രദേശത്താണ് സംഭവം നടന്നത്.

ഹോർമുസ് കടലിടുക്കിൽ അമേരിക്കൻ പതാകയുള്ള ഒരു വാണിജ്യ കപ്പലിനെ ഇറാൻ തടയാൻ ശ്രമിച്ചതായും റിപ്പോർട്ടുണ്ട്. യുഎസ് ഡിസ്ട്രോയർ ഇടപെട്ടാണ് കപ്പലിനെ രക്ഷപ്പെടുത്തിയത്.

മേഖലയിൽ ഇറാൻ-അമേരിക്കൻ ബന്ധം ചർച്ചകളിലൂടെ മെച്ചപ്പെടുത്തുവാനുള്ള ശ്രമങ്ങൾ നടക്കുന്നതിനിടെയാണ് ഈ സംഭവങ്ങൾ.
എബ്രഹാം ലിങ്കൺ കപ്പലിനെയും ജീവനക്കാരെയും സംരക്ഷിക്കാനായി നടത്തിയ നിയമാനുസൃതമായ നീക്കമാണിതെന്ന് നേവി ക്യാപ്റ്റൻ ടിം ഹോക്കിൻസ് വ്യക്തമാക്കി.