കർക്കടകമാസ പൂജകൾക്കായി ശബരിമല നട തുറന്നു ആയിരങ്ങൾ ദർശനത്തിനായി;എത്തി ജൂലൈ 21 വരെ പ്രത്യേക പൂജകളും അഭിഷേകങ്ങളും നടക്കും

ശബരിമല: കർക്കടകമാസ പൂജകൾക്കായി ശബരിമല ശ്രീധർമ്മശാസ്താ ക്ഷേത്രനട വ്യാഴാഴ്ച വൈകിട്ട് ഭക്തജനങ്ങൾക്ക് തുറന്നു. വൈകിട്ട് 5 മണിക്ക് തന്ത്രി കണ്ഠര് മഹേഷ് മോഹനരുടെ സാന്നിധ്യത്തിൽ മേൽശാന്തി ഇ.ഡി. പ്രസാദ് നമ്പൂതിരി നട തുറന്ന് ദീപം തെളിയിച്ചു. തുടർന്ന് പതിനെട്ടാംപടിക്ക് താഴെയുള്ള ആഴിയിൽ അഗ്നി പകർന്നു.
ഭസ്മാഭിഷിക്തനായ അയ്യപ്പനെ ദർശിക്കാൻ ആയിരക്കണക്കിന് ഭക്തരാണ് ക്ഷേത്രനടയ്ക്ക് മുന്നിൽ കാത്തുനിന്നത്. നട തുറന്നതോടെ ശബരിമലയിൽ ഭക്തജനത്തിരക്കും വർധിച്ചു.
കർക്കടകമാസ പൂജകളുടെ ഭാഗമായി എല്ലാ ദിവസവും നെയ്യഭിഷേകം, കളഭാഭിഷേകം, അഷ്ടാഭിഷേകം, പടിപൂജ, പുഷ്പാഭിഷേകം ഉൾപ്പെടെയുള്ള പ്രത്യേക പൂജകൾ നടക്കും.
പൂജകൾ പൂർത്തിയാക്കി ജൂലൈ 21-ന് രാത്രി 10 മണിക്ക് ശബരിമല നട അടയ്ക്കും.
ദർശനത്തിന് എത്തുന്ന ഭക്തർ വെർച്വൽ ക്യൂ സംവിധാനത്തിലൂടെ മുൻകൂട്ടി സ്ലോട്ട് ബുക്ക് ചെയ്യണമെന്ന് ദേവസ്വം ബോർഡ് അറിയിച്ചു. തിരക്ക് ഒഴിവാക്കുന്നതിനും സുഗമമായ ദർശനം ഉറപ്പാക്കുന്നതിനുമായി മുൻകൂട്ടി രജിസ്റ്റർ ചെയ്യണമെന്ന് അധികൃതർ അഭ്യർഥിച്ചു.