കൊച്ചിയിൽ വൻ ലഹരിവേട്ട: 8.59 ഗ്രാം MDMA-യും രണ്ട് കിലോ കഞ്ചാവുമായി മൂന്നുപേർ അറസ്റ്റിൽ

​കൊച്ചിയിൽ വൻ ലഹരിവേട്ട: MDMA-യും കഞ്ചാവുമായി മൂന്ന് പേർ പിടിയിൽ

​കൊച്ചി: കൊച്ചി സിറ്റി പോലീസിന്റെ പ്രത്യേക മയക്കുമരുന്ന് വിരുദ്ധ സ്പെഷ്യൽ ഡ്രൈവ് ആയ 'ഓപ്പറേഷൻ തൂഫാൻ നാർക്കോ ഹണ്ടിന്റെ' ഭാഗമായി നടത്തിയ വ്യാപക റെയ്ഡിൽ രണ്ട് അന്യസംസ്ഥാന തൊഴിലാളികൾ ഉൾപ്പെടെ മൂന്ന് പേരെ പോലീസ് പിടികൂടി. ചേരാനല്ലൂർ, എറണാകുളം സെൻട്രൽ പോലീസ് സ്റ്റേഷൻ പരിധികളിൽ നിന്നായി 8.59 ഗ്രാം MDMA-യും രണ്ട് കിലോയോളം കഞ്ചാവുമാണ് പിടിച്ചെടുത്തത്.
​ചേരാനല്ലൂർ ഫെഡറൽ ബാങ്ക് ലിങ്ക് റോഡിന് സമീപമുള്ള വീട്ടിൽ നിന്ന് കോട്ടയം വെള്ളൂർ ചെമ്പൊടിച്ചിറ സ്വദേശി സാബു (25) ആണ് MDMA-യുമായി പിടിയിലായത്. ഇയാളിൽ നിന്ന് 8.59 ഗ്രാം മയക്കുമരുന്ന് കണ്ടെടുത്തു.
​മറ്റൊരു സംഭവത്തിൽ, എറണാകുളം എ. എൽ. ജേക്കബ് റോഡിന് സമീപത്ത് നിന്ന് 1.992 കിലോഗ്രാം കഞ്ചാവുമായി അസം നഗോൺ സ്വദേശി സിറാജുൽ ഹഖ് (28), ഒഡീഷ ഗജപതി സ്വദേശി ബസ്തബ് ബീറോ (26) എന്നിവരെ സെൻട്രൽ പോലീസും നാർക്കോട്ടിക് സെല്ലും ചേർന്ന് പിടികൂടി. പ്രതികൾ ലഹരിവില്പനയ്ക്കായി എത്തിച്ചതായിരുന്നു കഞ്ചാവ്.
​എറണാകുളം സിറ്റി പോലീസ് കമ്മീഷണർ കാളിരാജ് മഹേഷ് കുമാർ IPS-ന്റെ നിർദ്ദേശപ്രകാരം ഡി.സി.പിമാരായ അശ്വതി ജിജി IPS, അരുൺ K. പവിത്രൻ IPS എന്നിവരുടെ മേൽനോട്ടത്തിലായിരുന്നു പരിശോധന. നാർക്കോട്ടിക് സെൽ അസിസ്റ്റന്റ് കമ്മീഷണർ T. D. സുനിൽകുമാറിന്റെ നേതൃത്വത്തിലുള്ള ഡാൻസാഫ് ടീമാണ് പ്രതികളെ വലയിലാക്കിയത്. പ്രതികളെ കോടതിയിൽ ഹാജരാക്കും. വരും ദിവസങ്ങളിലും പരിശോധന കർശനമാക്കുമെന്ന് പോലീസ് അറിയിച്ചു.