കന്നഡ ചലച്ചിത്ര നടിയും മുൻ ബിഗ് ബോസ് താരവുമായ കൃഷി തപണ്ടയുടെ ബെംഗളൂരുവിലെ ഫ്ലാറ്റിൽ സുഹൃത്തിനെ മരിച്ച നിലയിൽ കണ്ടെത്തി

ബുധനാഴ്ച രാത്രിയാണ് ബെംഗളൂരു ആർ.ആർ നഗറിലുള്ള കൃഷിയുടെ ഫ്ലാറ്റിൽ സുഹൃത്തായ വൈശാഖ് (45) എന്ന ബിസിനസ്സുകാരനെ തൂങ്ങിമരിച്ച നിലയിൽ കണ്ടെത്തിയത്. പ്രാഥമിക വിവരങ്ങൾ പ്രകാരം ഇത് ഒരു ആത്മഹത്യയാണെന്ന് പൊലീസ് കരുതുന്നു. കൃഷി തപണ്ട ആ സമയം വീട്ടിൽ ഉണ്ടായിരുന്നില്ല. അവർ നെലമംഗല എന്ന സ്ഥലത്തായിരുന്നു. രാത്രി തിരികെ ഫ്ലാറ്റിലെത്തി സ്വന്തം താക്കോൽ ഉപയോഗിച്ച് വീട് തുറന്നപ്പോഴാണ് വൈശാഖിനെ കിടപ്പുമുറിയിൽ മരിച്ച നിലയിൽ കണ്ടത്. ഉടൻ തന്നെ കൃഷി പൊലീസിനെ വിവരമറിയിക്കുകയായിരുന്നു. ജീവിതം മടുത്തുവെന്നും താൻ ജീവനൊടുക്കാൻ പോകുകയാണെന്നും കാണിച്ച് മരണത്തിന് തൊട്ടുമുമ്പ് വൈശാഖ് കൃഷിക്ക് ഫോൺ കോളുകളും സന്ദേശങ്ങളും അയച്ചിരുന്നതായി പൊലീസ് സ്ഥിരീകരിച്ചിട്ടുണ്ട്.
ബംഗളൂരു ഗിരിനഗർ സ്വദേശിയായ വൈശാഖ് കഴിഞ്ഞ കുറച്ചുദിവസങ്ങളായി കൃഷിയുടെ അറിവോടെയാണ് ഈ ഫ്ലാറ്റിൽ താമസിച്ചിരുന്നത്. ഒരു പ്രമുഖ വ്യവസായിയെ ഭീഷണിപ്പെടുത്തി 7 കോടി രൂപ തട്ടിയെടുക്കാൻ ശ്രമിച്ച കേസിൽ ഈ വർഷം ഫെബ്രുവരിയിൽ ഇയാളെ പൊലീസ് അറസ്റ്റ് ചെയ്തിരുന്നു. പിന്നീട് ജാമ്യത്തിലിറങ്ങിയ ഇയാൾ കടുത്ത മാനസിക സമ്മർദ്ദത്തിലായിരുന്നുവെന്ന് റിപ്പോർട്ടുകൾ സൂചിപ്പിക്കുന്നു.
വൈശാഖിന്റെ ഭാര്യ മേഘ്നയുടെ പരാതിയിൽ ആർ.ആർ നഗർ പൊലീസ് അസ്വാഭാവിക മരണത്തിന് (UDR) കേസ് രജിസ്റ്റർ ചെയ്തിട്ടുണ്ട്.മരണത്തിൽ മറ്റാർക്കെങ്കിലും പങ്കുള്ളതായി കുടുംബം പരാതിപ്പെട്ടിട്ടില്ല. പൊലീസ് കൃഷി തപണ്ടയുടെ മൊഴി രേഖപ്പെടുത്തുകയും അന്വേഷണം തുടരുകയും ചെയ്യുന്നു.