മുഹറം ആശംസ നേർന്ന് പ്രധാനമന്ത്രി നരേന്ദ്ര മോഡി

മുഹറം പത്ത് പ്രമാണിച്ച് പ്രവാചക പൗത്രൻ ഇമാം ഹുസൈന്റെ രക്തസാക്ഷിത്വത്തെ അനുസ്മരിച്ച് പ്രധാനമന്ത്രി നരേന്ദ്ര മോദി. “ഹസ്രത്ത് ഇമാം ഹുസൈന്റെ ത്യാഗം സത്യത്തിന്റെയും നീതിയുടെയും പാതയിൽ ഉറച്ചുനിൽക്കാൻ അനേകം ആളുകൾക്ക് ഇന്നും പ്രചോദനമേകുന്നു വെന്നും ധീരതയുടെയും ദൃഢവിശ്വാസത്തിന്റെയും ശാശ്വതമായ കരുത്തിന്റെ ഓർമ്മപ്പെടുത്തൽ കൂടിയാണിതെന്നു”മാണ് പ്രധാനമന്ത്രിയുടെ എക്സ് പോസ്റ്റ്.

ഇന്ത്യയിലെയും ലോകമെമ്പാടുമുള്ള മുസ്ലിം സമൂഹം മുഹറത്തിലെ പത്താം ദിവസമായ ആശുറ ആചരിക്കുന്ന വേളയിലാണ് മോദിയുടെ ഈ കുറിപ്പ്. പ്രവാചകൻ മുഹമ്മദ് നബിയുടെ ചെറുമകനായ ഇമാം ഹുസൈനും അദ്ദേഹത്തിന്റെ അനുയായികളും കർബലയിൽ വരിച്ച രക്തസാക്ഷിത്വത്തെ അനുസ്മരിച്ച് ഉത്തരേന്ത്യയിലും ലോകത്തിൻ്റെ വിവിധ ഭാഗങ്ങളിലും ഘോഷയാത്രകൾ നടക്കുന്നുണ്ട്.

മുഹറം ഘോഷയാത്രകൾക്ക് ഇത്തവണ കർശന വ്യവസ്ഥകളും വൻ സുരക്ഷാ ക്രമീകരണങ്ങളുമാണ് ഒരുക്കിയിരിക്കുന്നത്.