തിരൂരിൽ ഇന്നലെ ഉമ്മയും കുഞ്ഞും കിണറ്റിൻ മരിച്ച നിലയിൽ കണ്ടെത്തിയ സംഭവത്തിൽ ആത്മഹത്യ കുറിപ്പ് കണ്ടെത്തി

തിരൂരില്‍ മാതാവും ഒന്നര വയസുകാരൻ മകനും സ്വന്തം വീട്ടിലെ കിണറ്റില്‍ വീണു മരിച്ച സംഭവത്തില്‍ കൂടുതല്‍ വിവരങ്ങള്‍ പുറത്ത്. ഏഴൂർ സ്വദേശിനി ഇർഫാന (30), മകൻ അമാൻ മാലിക്ക് (2) എന്നിവരാണ് മരിച്ചത്. യുവതി കുഞ്ഞുമായി കിണറ്റില്‍ ചാടുകയായിരുന്നുവെന്നാണ് വിവരം. ഇന്നലെ വൈകുന്നേരത്തോടെയാണ് സംഭവം. കോഴിക്കോട് സ്വദേശിയായ ഭർത്താവ് റാഫി വിദേശത്താണ്. ഇർഫാനയുടെ പിതാവ് പള്ളിയില്‍ പോയ സമയത്തായിരുന്നു സംഭവം നടന്നത്. യുവതിയുടെ ആത്മഹത്യാക്കുറിപ്പ് പൊലീസ് കണ്ടെടുത്തു.

ഇർഫാനയുടെ മാതാവ് നാല് മാസം മുൻപ് മരണപ്പെട്ടിരുന്നു. ഇതില്‍ കടുത്ത മനോവിഷമത്തിലായിരുന്നു യുവതിയെന്നാണ് പൊലീസ് പറയുന്നത്. തിരൂർ പൊലീസ് അന്വേഷണം ആരംഭിച്ചിട്ടുണ്ട്. മൃതദേഹങ്ങള്‍ തിരൂർ ജില്ലാ ആശുപത്രി മോർച്ചറിയില്‍ സൂക്ഷിച്ചിരിക്കുകയാണ്. പോസ്റ്റുമോർട്ടത്തിനുശേഷം ബന്ധുക്കള്‍ക്ക് വിട്ടുനല്‍കും.