തിരഞ്ഞെടുപ്പ് പെരുമാറ്റച്ചട്ടം നിലവിൽ വരുന്നതിന് മണിക്കൂറുകൾക്കു മുമ്പ് മോട്ടോർ വാഹന വകുപ്പിൽ തിരക്കിട്ട സ്ഥലംമാറ്റം

തെരഞ്ഞെടുപ്പ് പെരുമാറ്റച്ചട്ടം നിലവിൽവരാൻ മണിക്കൂറുകൾ മുമ്പ് മോട്ടോർ വാഹനവകുപ്പിൽ ഉദ്യോഗസ്ഥരുടെ കൂട്ടസ്ഥലംമാറ്റം. എൻഫോഴ്‌സ്‌മെന്റ്, മിനിസ്റ്റീരിയൽ വിഭാഗങ്ങളിലെ നൂറുകണക്കിന് ജീവനക്കാരെയാണ് അസാധാരണമായ വേഗത്തിൽ സ്ഥലം മാറ്റിയിരിക്കുന്നത്. അവധി ദിവസങ്ങളായ ശനി, ഞായർ ദിവസങ്ങളിലാണ് ഉത്തരവുകൾ പുറത്തിറങ്ങിയതെങ്കിലും ഇവയിൽ രേഖപ്പെടുത്തിയിരിക്കുന്നത് വെള്ളിയാഴ്ചത്തെ തീയതിയാണ് എന്നത് ശ്രദ്ധേയമാണ്.

ആദ്യഘട്ട പട്ടികയിൽ മാറ്റിയിരിക്കുന്നത് 98 മോട്ടോർ വെഹിക്കിൾ ഇൻസ്പെക്ടർമാരെയാണ്. ഇവർക്ക് പുറമെ 105 അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർമാരെയും 145 മിനിസ്റ്റീരിയൽ ജീവനക്കാരെയും സ്ഥലംമാറ്റിക്കൊണ്ടുള്ള ഉത്തരവുകൾ പുറത്തുവന്നു. സ്ഥലംമാറ്റം ലഭിച്ച ഉദ്യോഗസ്ഥർ ഇന്ന് രാവിലെ തന്നെ പുതിയ ഓഫീസുകളിൽ ജോലിയിൽ പ്രവേശിക്കണമെന്നുള്ള കർശന നിർദ്ദേശവും നൽകിയിട്ടുള്ളത്.