ഡ്രോൺ അമേരിക്ക വെടിവെച്ചിട്ടെന്ന വാദം തള്ളി ഇറാൻ

ഇറാൻ വിപ്ലവ ഗാർഡിന്റെ (ഐആർജിസി) അത്യാധുനിക നിരീക്ഷണ ഡ്രോണായ 'ഷാഹിദ്-129' അമേരിക്കൻ സൈന്യം വെടിവെച്ചിട്ടെന്ന വാർത്തകൾ തള്ളി ഇറാൻ രംഗത്ത് .ഡ്രോൺ ദൗത്യം വിജയകരമായി പൂർത്തിയാക്കിയെന്നും, നിർണായക വിവരങ്ങളും ദൃശ്യങ്ങളും കമാൻഡ് സെന്ററിൽ ലഭിച്ചുവെന്നും സൈനികവൃത്തങ്ങളെ ഉദ്ധരിച്ച് ഇറാൻ വാർത്താ ഏജൻസി 'തസ്‌നീം ന്യൂസ്' റിപ്പോർട്ട് ചെയ്യുന്നു. ഗൾഫ് മേഖലയിൽ യുദ്ധഭീതി നിലനിൽക്കെ തങ്ങളുടെ സൈനിക കരുത്തിനെ ഇകഴ്ത്തിക്കാണിക്കാനും ആഗോളതലത്തിൽ തെറ്റിദ്ധാരണ പരത്താനും അമേരിക്കയും പാശ്ചാത്യ മാധ്യമങ്ങളും നടത്തുന്ന ഗൂഢനീക്കത്തിന്റെ ഭാഗമാണ് ഈ വ്യാജ വാർത്തയെന്നാണ് ഉദ്യോഗസ്ഥർ ചൂണ്ടിക്കാട്ടുന്നത്.

ഡ്രോൺ നൽകപ്പെട്ട ദൗത്യം വിജയകരമായി പൂർത്തിയാക്കിയതായും തസ്‌നിം ന്യൂസ് പുറത്തുവിട്ട റിപ്പോർട്ടിൽ പറയുന്നു. തകരാർ സംഭവിക്കുന്നതിന് മുൻപ് തന്നെ ഡ്രോൺ പകർത്തിയ നിർണായകമായ നിരീക്ഷണ ദൃശ്യങ്ങളും ചിത്രങ്ങളും വിവരങ്ങളും കമാൻഡ് സെന്ററിലേക്ക് വിജയകരമായി കൈമാറിയിരുന്നു. അതിർത്തി മേഖലകളിലും സമുദ്രത്തിലും നിരീക്ഷണം നടത്താനായി അയച്ച ഡ്രോൺ ശത്രുസൈന്യത്തിന്റെ ആക്രമണത്തിൽ തകർന്നിട്ടില്ലെന്നും ദൗത്യത്തിലുടനീളം അത് സുരക്ഷിതമായിരുന്നുവെന്നുമാണ് ഇറാൻ സൈനിക വൃത്തങ്ങൾ വ്യക്തമാക്കുന്നത്